Tramp Eron rahbarligi uchun «uch yaxshi nomzod» borligini aytdi

AQSh prezidenti Donald Tramp Axios nashriga bergan intervyusida Eronda hokimiyatga Mo‘jtabo Xominaiy kelishini qo‘llab-quvvatlamasligini va mamlakatning yangi rahbarini tanlashda shaxsan ishtirok etish niyati borligini bildirdi. Intervyu 5 mart, payshanba kuni e’lon qilindi.

«Ular vaqtni bekor sarflayapti. Xominaiyning o‘g‘li — arzimas odam. Men tayinlash jarayonida ishtirok etishim kerak, xuddi Venesuelada Delsi (Rodriges) bilan bo‘lgani kabi», — dedi Tramp Axios’ga bergan intervyusida.

AQSh prezidentining so‘zlariga ko‘ra, 56 yoshli, aviahujumlar natijasida halok bo‘lgan oliy rahbarning o‘g‘li Vashington uchun «qabul qilib bo‘lmaydigan nomzod». Shuningdek, avvalgi siyosatni davom ettiradigan boshqa har qanday voris ham maqbul emas. Aks holda, Trampning ta’kidlashicha, AQShga «besh yildan keyin yana urishishga to‘g‘ri keladi».

Tramp avvalroq bu lavozim uchun «juda yaxshi uch nomzod» borligini aytgan, ammo ularning ismini ochiqlamagan.

Tramp, shuningdek, agar Tehron Vashington bilan hamkorlik qilishni boshlasa, Eron hukumatining ko‘pchilik a’zolari o‘z lavozimlarida qolishi mumkinligini aytdi — bu Venesuelada bo‘lgani kabi bo‘lishi mumkin. Uning fikricha, yangi rahbar «Eronga uyg‘unlik va tinchlik olib kelishi» kerak.

Mo‘jtabo Xominaiy 28 fevral kuni otasi halok bo‘lganidan keyin Eronning oliy rahbari lavozimiga asosiy nomzod bo‘lib qolmoqda. Yangi rahbarni 88 nafar ulamodan iborat ekspertlar assambleyasi saylashi kerak. Uning prezidiumi a’zosi Mahmud Rajabiy 4 mart kuni bu jarayon allaqachon boshlanganini ma’lum qildi.

Shu bilan birga, Eron muxolifat nashri Iran International Mo‘jtabo allaqachon saylanganini iddao qildi. Isroil esa avvalgi siyosatni davom ettiradigan har qanday yangi Eron rahbarini «yo‘q qilish uchun nishon» deb hisoblashini bildirdi.

The New York Times manbalari ta’kidlashicha, hokimiyatning otaning o‘g‘liga o‘tishi shia ruhoniylari orasida ma’qullanmaydi va Mo‘jtaboning tayinlanishi mamlakat ichida norozilikka sabab bo‘lishi mumkin.

Shu bilan birga, AQSh razvedkasi Eronda rejim almashishi ehtimolini shubha ostiga qo‘ymoqda.

Reuters manbalariga ko‘ra, muxolifatning hokimiyatga kelish ehtimoli juda past deb baholanmoqda. Chunki mamlakatning siyosiy va harbiy tizimining asosini Islom inqilobi muhofizlari korpusi tashkil qiladi va uning vakillari o‘z imtiyozlaridan ixtiyoriy ravishda voz kechishi ehtimoli kam.

Hozir Eronni uch kishidan iborat vaqtinchalik kengash boshqarmoqda: prezident Mas’ud Pezeshkiyon, sud hokimiyati rahbari G‘ulom Husayn Muhsiniy va Alirizo Arofiy.