OAV: chechen maxsus kuchlari Suriyadagi Hmaymim aviabazasini qo‘riqlaydi

Rossiya mudofaa vazirligining Chechenistonda joylashgan maxsus maqsaddagi "G‘arb" va "Sharq" batalonlari harbiylari Suriyadagi Hmaymim aviabazasini qo‘riqlashni boshlaydilar, deb yozmoqda "Izvestiya" nashri.

Bu harbiy qismlar 2003 yilda tashkil etilib, uzoq vaqt davomida chechenistonliklar bilan butlangan va shu sababli "chechen maxsus kuchlari" degan norasmiy nom olgan. Mutaxassislarning fikricha, bu harbiylar aviabazadagi Rossiya aviaguruhini IShIDning qo‘poruvchi harakatlaridan ishonchli himoya qila oladi. 

Ushbu batalonlar tog‘lar va odamlar yashaydigan hududlarda boy jangovar xizmat tajribasiga ega. Mutaxassislarning fikricha, aynan shunday malakalar Rossiyaning Suriyadagi harbiy obektlari xavfsizligini ta'minlash uchun zarurdir.