Donald Tramp – AQShning 45-prezidenti

Vashington shahridagi Kapitoliy binosi hovlisida AQShning 45-prezidenti Donald Trampning tantanali inauguratsiyasi marosimi bo‘lib o‘tdi. U mamlakat va Konstitutsiyaga sodiq bo‘lishiga tantanali qasamyod qildi.

"Men, Donald Jon Tramp, tantanali qasamyod qilamanki, Qo‘shma Shtatlar prezidenti majburiyatlarini sidqidildan bajaraman va kuchim boricha Qo‘shma Shtatlar Konstitutsiyasini qo‘llab-quvvatlayman, himoya qilaman hamda muhofaza qilaman. Xudo menga yordam bersin", - deya, chap qo‘lini Injilga qo‘ygan holda tantanali qasamyod so‘zlarini aytdi. Injilni uning rafiqasi va Amerikaning yangi birinchi xonimi Melaniye Tramp ushlab turdi.

"Tabriklarimni qabul qiling, janob prezident", - degan Oliy sud raisi Roberts. U Tramp qasamyodini qabul qildi.

Shundan so‘ng, Kapitoliy tepaligi ustida artilleriya aslahalaridan 21 marta zambarak otildi.