Kreml Xitoy Rossiya bilan chegarada raketalar joylashtirganiga izoh berdi

Moskva Xitoy qurolli kuchlarining rivojlanishini tahdid deb qabul qilmayapti, deb xabar berdi RIA Novosti. Bu haqda Rossiya prezidenti matbuot kotibi Dmitriy Peskov ma'lum qilgan. U rasmiy Pekin Rossiya bilan chegaraga yaqin hududda qit'alararo ballistik raketalarni joylashtirgani haqidagi OAV xabarlariga izoh bergan.

Avvalroq Xitoy Rossiya bilan chegarada joylashgan Xeyluntszyan shimoli-sharqiy viloyatida o‘zi ishlab chiqargan DF-41 qit'alararo ballistik raketalarni joylashtirgani haqida Global Times gazetasi xabar bergandi. Tasdiqlanmagan ma'lumotlarga qaraganda, DF-41’ning maksimal parvoz masofasi 14 ming kilometrga teng. Taxminlarga ko‘ra, u o‘ziga 10-12 individual qaratilgan yadro bloklari joylashtirilgan ajraluvchi bosh qismi bilan jihozlangan. 

"Xitoy bizning strategik ittifoqchimiz, siyosiy va savdo-iqtisodiy yo‘nalishdagi sherigimiz sanaladi. Biz o‘zaro munosabatlarni qadrlaymiz. Xitoy qurolli kuchlarining rivojlanish rejasidagi qandaydir harakatlarni mamlakatimiz uchun tahdid, deb qabul qilmaymiz", - dedi Peskov.

Avvalroq Xitoy xalq-ozodlik armiyasi umumiy hisobda uchta Dongfeng-41 raketalari bo‘lgan brigadalarni joylashtirishi haqida xabar berilgandi. Ulardan biri katta ehtimol bilan Xenan viloyatidagi Sinyan shahrida bo‘lsa, ikkinchi brigada Xeyluntszyan viloyatidagi Datsin shahrida joylashtirilgan. Uchinchisi esa – Shinjon-Uyg‘ur muxtor hududida.