Tramp farmoniga qaramay 900ga yaqin muhojir AQShga kiradi

Amerika hukumati, AQSh prezidenti Donald Trampning farmoniga qaramay, 872 nafar qochqinning mamlakatga kirishiga ruxsat bergan. Bu haqda Reyter agentligi AQSh ichki xavfsizlik vazirligining ichki hujjatiga asoslangan holda xabar qilmoqda. 

Agentlik ma'lumotlariga ko‘ra, bu qochqinlar shu haftaning o‘zida AQShga kirishlari mumkin bo‘ladi. Vazirlikdagi manbaning so‘zlariga ko‘ra, ularga Tramp farmonni imzolashidan avval ruxsat berilgan. Qochqinlar qaysi mamlakatlar fuqarolari ekaniga oydinlik kiritilmagan. 

Hujjatda aytilishicha, 27 yanvar kechqurundan 30 yanvar ertalabgacha 348 kishiga samolyotga chiqishga ruxsat berilmagan, yana 200 kishiga AQSh hududiga qo‘nganidan so‘ng, kirish rad etilgan. 730 kishi, shu jumladan, 394 nafar AQShning qonuniy rezidentlari Amerika aeroportlaridagi bojxona-chegara xizmatlarida so‘roq qilingan.