BAA: Tramp farmoni aniq bir dinga qarshi qaratilmagan

BAA tashqi ishlar vazirligi rahbari Abdulla bin Zayid al-Nahayyan AQSh prezidenti Donald Tramp muhojirlik farmonini imzolash chog‘ida o‘zining suveren huquqidan foydalandi, deb ma'lum qildi. Bu qaror ma'lum bir dinga qarshi qaratilmagan.

"Mamlakatlarda o‘z suverenitetini ta'minlash bo‘yicha qarorlarni qabul qilishda suveren huquq bor. AQSh prezidenti bu huquqdan foydalandi. Bu qaror dinga qarshi qaratilgan, degan gap-so‘zlar tarqaldi. U aniq bir dinga qarshi qaratilmagan, bu qaror vaqtinchalik", - dedi al-Nahayyan jurnalistlarga.

Avvalroq AQSh prezidenti Donald Tramp "Mamlakatning xorijiy terrorchilar kirishidan himoyasi to‘g‘risida"gi farmonga imzo chekdi. U AQShga 90 kun davomida yetti mamlakat (Eron, Iroq, Yaman, Liviya, Suriya, Somali va Sudan) fuqarolari kirishini taqiqladi, shuningdek barcha qochqinlarni qabul qilishni 120 kunga to‘xtatib qo‘ydi.