Britaniyalik liberal-demokratlar yetakchisi iste'fo berdi

Britaniyalik liberal-demokratlar yetakchisi Tim Ferron iste'foga chiqdi. Uning ma'lum qilishicha, bir vaqtning o‘zida “siyosiy yetakchi” va “sodiq xristian” bo‘la olmaydi. Uning so‘zlariga ko‘ra, diniy e'tiqodi jurnalistlar e'tiborini partiyaning saylovoldi dasturidan o‘ziga qaratib olgan.

«Menga dinim tufayli shubha bilan qaray boshlashdi. Demak, liberal jamiyatda yashayotganimizni iddao etib, biz o‘zimizni aldaymiz. Shuning uchun liberal-demokratlar yetakchisi lavozimini tark etishga qaror qildim», - deya Ferronning so‘zlarini keltiradi Bi-bi-si. Uning ta'kidlashicha, “har doim liberal bo‘lib qoladi” va “insonlar huquq hamda erkinliklarini ularning e'tiqodidan qat'iy nazarda himoya qilish kerak” deb hisoblaydi.

Eslatib o‘tamiz, 8 iyun kuni bo‘lib o‘tgan navbatdan tashqari parlament saylovlarida liberal-demokratlar 12 ta mandatni qo‘lga kiritdi. Konservatorlar esa parlamentdagi o‘z pozitsiyalarini mustahkamlay olishmadi.