O‘zbekistondan Rossiyaga to‘qimachilik mahsulotlari «yashil yo‘lak» orqali yetkaziladi

O‘zbekiston va Rossiya Federatsiyasi o‘rtasida O‘zbekistondan to‘qimachilik mahsulotlari yetkazib berish uchun «yashil yo‘lak» yaratish borasida ishlar olib borilmoqda.

Rossiya Sanoat va savdo vazirligi vakili Yevgeniy Rijovning Toshkentda 23 oktabr kuni boshlangan Xalqaro paxta yarmarkasi doirasidagi majlisda ma'lum qilishicha, bunday «yashil yo‘lak» O‘zbekistondan kulrang va qora importning oldini oladi.

«Biz «yashil yo‘lak» yaratish orqali O‘zbekistondan paxta va to‘qimachilik mahsulotlari noqonuniy importiga chek qo‘ymoqchimiz. Bunday mahsulotlar hajmi hozircha ko‘p», — degan u.

U paxta va to‘qimachilik mahsulotlari uchun bojxona rasmiy jarayonlari maksimal darajada qulaylashtiriladi. Mahsulotlar kerakli joyga, Rossiya to‘qimachilik markaziga aylangan Ivanovo viloyatiga yetib borganidan so‘ng bojxona ko‘rigidan o‘tadi.

Rijov keyingi ikki yilda O‘zbekistondan Rossiyaga to‘qimachilik mahsulotlari yetkazib berish hajmi sezilarli darajada oshganini qayd etgan. 

«Endi gap paxta tolasi haqida emas, tayyor mahsulotlar, sifatli mahsulotlar haqida ketmoqda», — deya qo‘shimcha qilgan u.