Britaniyalik qariya miyasida doimo madhiya yangrayotganidan shikoyat qilmoqda

Britaniyaning Bilton shahrida yashovchi 87 yoshli Ron Goldspnik noodatiy kasallikdan aziyat chekmoqda. Qariya miyasida erkaklar xori ijrosida davlat madhiyasini eshitayotganidan arz qilmoqda.

Bu kasallik to‘satdan boshlangan va erkak dastlab madhiya qo‘shnilari uyida yangramoqda, deb o‘ylagan.

“Men ularga shikoyat qilgani chiqqanimda, ular uylarida madhiyani tinglashmaganini aytishgan. O‘shanda muammo ularda emas, menda ekanligini angladim”, deb aytmoqda qariya. Uning aytishicha, madhiya miyasida 4 oy oldin yangray boshlagan.

Britaniyalik uchragan kasallik “musiqiy quloq sindromi” deb ataladi va 65 yoshdan katta 10 ming kishidan bittasida uchraydi. Keksa yoshli kishilarda eshitish qobiliyatining yo‘qotilishi shunday musiqiy gallyutsinatsiyalar bilan kechadi.

Britaniyalikning aytishicha, gohida madhiya miyasida juda baland yangraydi. Qariyani davolayotgan shifokor unga qanday yordam berish mumkinligini bilolmayapti. Ron o‘zi uchun ochgan, gallyutsinatsiyaga qarshi kurashishning yagona yo‘li televizor ovozini balandroq ko‘tarib qo‘yish bo‘lmoqda.

Qariya yaqin orada Biltonga keladigan Britaniya qirolichasi bilan uchrashib, unga madhiyani undan ko‘proq marta eshitganini ma'lum qilmoqchi.