Xiaomi Hindiston smartfonlar bozorida yetakchilikni qo‘lga oldi

Xitoyning Xiaomi kompaniyasi Hindiston smartfonlar bozorida yetakchiga aylandi, deb xabar bermoqda IDC tahliliy agentligi. Avvalgi yetakchi Samsung 2-o‘ringa tushgan.

Xiaomi vitse-prezidenti Manu Jyeynaning aytishicha, 2017 yilning 3-choragida kompaniya Hindistonda 9,2 mln ta smartfon sotgan va o‘tgan yilgi savdolarga nisbatan 300 foizlik o‘sishni namoyish qilgan. Statistikaga muvofiq, xitoyliklar va koreyslar bozorning deyarli teng ulushiga – 23,5 foiziga egalik qilmoqdalar. 

Xiaomi’ning savdolar hajmi o‘sishiga smartfonlarining arzonligi asosiy omil bo‘lmoqda. Mutaxassislar ma'lumotlariga ko‘ra, Xiaomi smartfonlarining Hindistondagi narxi 6 ming rupiydan 15 ming rupiygacha (65-230 dollar) turadi.  

Oktyabr oxirida Hindistonda smartfonlar savdosi hajmi 23 foizga o‘sib, mamlakat bu borada AQShni ortda qoldirib, 2-o‘ringa ko‘tarilib oldi. Yetakchilik hamon Xitoyga tegishli. 2017 yil 3-choragida Hindistonga Samsung, Xiaomi, Vivo, Oppo va Lenovo smartfonlaridan 40 mln dona olib kirilgan.