Turkiyada bitkoinlarni o‘margan shaxslarga qarshi ilk bor politsiya amaliyoti o‘tkazildi

Turkiya politsiyasi Istanbulda mahalliy tadbirkordan 450 bitkoinni o‘g‘irlab ketgan jinoyatchilarga qarshi mamlakatdagi ilk amaliyotni o‘tkazdi, deb xabar bermoqda Haberturk telekanali.

Xabarga ko‘ra, besh nafar o‘g‘ri o‘zini politsiyachi sifatida tanishtirib, qurbonni mashinaga o‘tirishga majburlagan hamda to‘pponcha bilan kriptovalyutadagi hisobga maxfiy so‘zni so‘rab tahdid qilgan. Tadbirkorning so‘zlariga ko‘ra, jinoyatchilar uni mashinada 8 soat davomida ushlab turishgan va unga nisbatan jismoniy zo‘ravonlik qo‘llashgan. Yakunda ular 450 bitkoinni qo‘lga kiritishdi (taxminan 3,5 mln. dollar).

Jabrlanuvchi politsiyaga murojaat qildi, tegishli xodimlar videokuzatuv kameralaridan ma'lumotlarni o‘rganib, amaliyot o‘tkazishdi hamda besh jinoyatchini ushlashdi. Ma'lum bo‘lishicha, ulardan biri qamoqdan qochgani uchun qidiruvda bo‘lgan.

Eslatib o‘tamiz, avvalroq bitkoin yana rekordni «urgani» xabar qilingandi.