Erdo‘g‘anning advokati Turkiya prezidentining oilasiga qarshi ayblovlarni rad etdi

Turkiya prezidenti Rajab Toyyib Erdo‘g‘anning advokati Ahmad O‘zel Respublika xalq partiyasi raisi Kamol Qilichdor o‘g‘lining Turkiya davlat rahbarining qarindoshlari xorijiy kompaniya hisobiga pul o‘tkazganliklaridan dalolat beruvchi hujjatlarga egalik qilishi haqidagi ta'kidlovlari haqiqatga to‘g‘ri kelmasligini aytdi. "Anadolu" agentligi shu haqida xabar berdi. 

"Qilichdor o‘g‘li tomonidan Turkiya prezidentining qarindoshlariga nisbatan ilgari surilgan barcha ayblovlar butkul yolg‘on hisoblanadi, u o‘z partiyasining parlament fraksiyasida namoyish qilgan hujjatlar esa - soxta. Qilichdor o‘g‘li bu qog‘ozlarni darhol prokuraturaga topshirishi va sudga da'vo arizasini berishi kerak", - dedi O‘zel.

Advokat shuningdek Respublika xalq partiyasi raisi ushbu hujjatlar mazmunini ommaga oshkor qilishi kerakligini ta'kidladi. 

"Bundan tashqari, janob Mustafo Gyundogan - ishbilarmon va u hech qachon prezident kantselyariyasi rahbari bo‘lmagan. Mening mijozlarim hech qachon boshqa mamlakatdagi kompaniya hisobiga mablag‘ o‘tkazishmagan. Takrorlayman: Qilichdor o‘g‘li darhol bu qog‘ozlarni OAV va prokuraturaga topshirib, da'vo arizasi berishi kerak. Yana bir bor ta'kidlab aytamizki, na Turkiya prezidenti va na uning oila a'zolari xorijdagi kompaniya hisobiga mablag‘ o‘tkazgan emas", - qo‘shimcha qildi O‘zel.

Ahmad O‘zel Turkiya prezidenti va uning qarindoshlarining advokatidir.