OAV: Britaniya Yevropa Ittifoqidan chiqish uchun 45 mlrd yevro to‘laydi

Buyuk Britaniya Yevropa Ittifoqidan chiqish uchun 35-39 mlrd funt sterling (40-45 mlrd yevro) to‘laydi. Bu haqda Buyuk Britaniya hukumati rasmiy vakiliga iqtibos keltirgan holda Sky News telekanali xabar berdi.  

“Biz to‘lanadigan mablag‘ 35-39 mlrd funt sterling bo‘lishini kutmoqdamiz. Biz bunga o‘z majburiyatlarimizni halol hal qilishdek qaraymiz. Biz hamisha agar majburiyatlarimiz bo‘lsa, uni bajaramiz, deganmiz”, deb aytdi rasmiy vakil.

Ushbu miqdor Buyuk Britaniya moliya vazirligi ishchi guruhlari va Yevropa Ittifoqining Brexit bo‘yicha koordinatori Mishel Barnening texnik uchrashuvida kelishilgan.

Avvalroq Barne tomonlar Buyuk Britaniyaning YeIdan chiqishi bo‘yicha muzokaralarda keyingi bosqichga o‘tish uchun ancha siljishga erishishganini ma'lum qilgandi. Brexit bo‘yicha keyingi muzokaralar bosqichi savdo va xavfsizlik masalalarini hal qilishni ko‘zda tutadi.