Tramp: AQSh harbiylari Afg‘onistonda jangning yangi qoidalarini o‘zlashtirishdi

AQSh prezidenti Donald Tramp Amerika kongressi oldida «Mamlakat holati haqida» nutqi bilan chiqish qilib, Qo‘shma Shtatlar qo‘shinlarining Afg‘onistondan olib chiqilishi uchun «sun'iy vaqt chegaralari» bo‘lmasligini ma'lum qildi.

«Afg‘onistondagi bizning jangchilarimiz jangning yangi qoidalarini o‘zlashtirishdi. Afg‘onistonda bizning qurolli kuchlar qahramon sheriklar bilan endi sun'iy vaqt chegaralari tufayli xavfga uchramayapti, hamda biz dushmanlarimizga o‘z rejalarimizni aytayotganimiz yo‘q», - deya aytib o‘tdi Tramp.

Eslatib o‘tamiz, avvalroq AQSh prezidenti Donald Tramp toliblar bilan muzokaralarni istisno etib, Kobulda yuz bergan qator terrorchilik hujumlaridan so‘ng ularni «tugatish» haqida va'da bergandi.