Turkiya, Rossiya va Eron prezidentlari yana uchrashadi

4 aprel kuni Anqara shahrida Turkiya prezidenti Rajab Toyyib Erdo‘g‘an, Rossiya prezidenti Vladimir Putin va Eron prezidenti Hasan Ruhoniy Suriya masalasini muhokama qiladi.

Turkiya prezidenti ma'muriyatidan xabar qilishlaricha, siyosatchilar uchrashuvidan bir kun oldin, 3 aprel kuni Anqarada Rossiya-Turkiya Oliy darajadagi hamkorlik kengashining yettinchi yig‘ilishi o‘tkaziladi.

Yig‘ilish Erdo‘g‘an va Putin raisligida o‘tkazilib, unda ikki davlat munosabatlari keng ko‘lamda muhokama etiladi. 

Turkiyaga tashrif doirasida Putin «Akkuyu» AESga poydevor yotqizish marosimida ishtirok etadi.

Shu kunlarda Turkiya va Eron prezidentlarining ikki tomonlama uchrashuviga ham tayyorgarlik ishlari olib borilmoqda.