Vashington Asad bilan to‘g‘ridan-to‘g‘ri muloqot olib bormaydi

AQSh prezidenti Donald Tramp ma'muriyati Suriya prezidenti Bashar Asad bilan to‘g‘ridan-to‘g‘ri muzokaralar olib borish niyatida emas. Bu haqda AQShning BMTdagi doimiy vakili Nikki Xeyli CBS telekompaniyasiga bergan intervyusida aytib o‘tdi.

“Biz hech qachon Suriya bilan to‘g‘ridan-to‘g‘ri muzokaralarga kirishmaymiz. Ular (Asad hukumati) AQShning muzokaralar olib borishiga arzimaydi”, deb aytgan Xeyli.

Xeylining aytishicha, “ular o‘z xalqiga nisbatan faqat zo‘ravonlik qo‘llaydi va o‘z davlatini barbod qilmoqda”. “Jyeneva jarayoniga kelsak, AQSh unda boshidan beri ishtirok etmoqda va keyin ham ishtirok etadi. Biroq biz Asad bilan birga-bir muzokaralar olib bormoqchi emasmiz”, deb qo‘shimcha qilgan AQSh vakili.

Xeylining ta'kidlashicha, Suriyaga berilgan zarbalar Asadning tinch aholiga nisbatan qo‘llagan “tajovuzkor harakatlari” tufayli sodir etilgan.