Toshkent aeroportida bolalar o‘yingohi paydo bo‘ladi

Islom Karimov nomidagi Toshkent aeroporti ma'muriyati xalqaro yo‘nalishlar aerovokzalida bolalar o‘yin maydonchasini tashkil qilmoqchi. Shu munosabat bilan aeroport ma'muriyati ushbu maydonchani tashkillashtirish bo‘yicha takliflar tanlovini e'lon qildi.

Aeroport ma'lumotlariga ko‘ra, o‘yingoh maydoni 20-40 metr kvadratni tashkil qiladi. Maydoncha uchib ketuvchi yo‘lovchilar blokida tashkillashtiriladi va 3-10 yoshli bolalar uchun mo‘ljallanadi. 

Aeroport ma'muriyati har qanday taklif va loyihalarni ko‘rib chiqishini ma'lum qilgan.

Tanlovda ushbu sohada 3 yildan ko‘proq faoliyat yuritayotgan istalgan tashkilotlar ishtirok etishi mumkin. Takliflar qabul qilinishi 16 may kuni tugaydi.