O‘zbekistonda xorijiy kinokompaniyalarga yana bir yengillik berildi

Xorijiy kinokompaniyalari endi O‘zbekiston moddiy va madaniy meros obektlarida suratga olish ishlari uchun pul to‘lashga majbur bo‘lmaydi.

«Xorijiy kompaniyalar bu yig‘im va moddiy-madaniy meros obektlarida kinofilmlarni suratga olish uchun ijara haqini to‘lashdan ozod etiladi. Ularga O‘zbekiston brendini targ‘ib qilish sharti qo‘yilgan», - deya xabar bergan Davlat turizm qo‘mitasi.

Hukumatning «Xorijiy kinokompaniyalar tomonidan O‘zbekiston Respublikasi hududida badiiy filmlarni kino-videoga suratga olish tartibi to‘g‘risida»gi qarori bilan xorijiy mamlakatlar kinokompaniyalariga har bir suratga olish kuni uchun 800 ming so‘m miqdorida haq to‘lash belgilab qo‘yilgan.

Endi O‘zbekistonda suratga olingan, mamlakatning moddiy va madaniy merosiga aloqador kadrlar namoyishi vaqtida mamlakatni va tarixiy obektning nomini alohida kadr bilan kirish yoki yakuniy titrlarda ko‘rsatish kifoya qiladi.