Turkiya AQShdan ilk F-35 qiruvchi samolyotlarini oldi

Turkiya 21 iyunda AQShdan ilk ikkita 5-avloddagi F-35 Lockheed Martin qiruvchi samolyotini oldi. Bu haqda Lockheed Martin kompaniyasi ma'lum qildi.

Samolyotlar tantanali ravishda Lockheed Martin’ning Fort-Uert shahridagi (Texas shtati) zavodida turk tomoniga topshirilgan. Ushbu samolyotlar Arizona shtatidagi Lyuk bazasiga jo‘natiladi. Bu yerda turk uchuvchilari samolyotlarda uchishga o‘rgatiladilar. Rejaga ko‘ra, Anqara 100 tadan ko‘proq F-35 samolyoti olishi kerak.

Shu tariqa Vashingtonning Turkiyaga samolyotlarni yetkazib berish qarori AQShning turk bozorini yo‘qotmaslik maqsadida, Anqara tomonidan Rossiyaning S-400 zenit-raketa majmualari sotib olinishi muqarrarligini tan olgan holda murosaga borganini anglatadi.