Yaponiya Rossiyaga KXDR bo‘yicha chaqiriq bilan chiqdi

Yaponiya parlamentining maslahatchilar palatasi raisi Tyuiti Date Shimoliy Koreyaning yadroviy qurolsizlanishi sohasida Rossiya va Yaponiya qalinroq hamkorlik qilishiga umid bildirdi. Bu haqda RIA «Novosti» xabar qilmoqda.

Ta'kidlanishicha, Date Federatsiyalar kengashi yalpi majlisida shu haqda ma'lum qilgan. Yapon siyosatchisi fikricha, KXDR yadrosizlanishi Shimoli-Sharqiy Osiyoda barqarorlik hamda farovonlikning shartidir.

«Bunday holatda Yaponiya va Rossiyaning hamkorligi juda muhim ahamiyat kasb etadi. Biz Rossiya bilan bu sohada yanada qalin hamkorlik o‘rnatilishiga umid qilmoqdamiz», - dedi Date.

Shuningdek, uning ta'kidlashicha, Yaponiya Koreya yarim orolidagi yadro muammosiga yechim topish uchun ko‘rilayotgan barcha choralarni qo‘llab-quvvatlaydi. Biroq, «Shimoliy Koreyani ijobiy rivojlanish yo‘liga qaratish uchun», butun jahon hamjamiyatining birgalikdagi sa'y-harakatlari va qalin hamkorligi zarur.