Namangan qo‘l jangi bo‘yicha chempionlar ligasi xalqaro turniriga mezbonlik qildi

24 iyul kuni Namangan shahrining Navbahor markaziy o‘yingohida qo‘l jangi sport turi bo‘yicha xalqaro turnir o‘tkazildi. Musobaqada jahon chempionlari, shuningdek, o‘z qit'asi va davlatida tengsiz deb topilgan sportchilar kuch sinashdi.

Turnirga Namangan viloyati hokimi Xayrullo Bozorov nutqidan so‘ng start berildi. Xalqaro qo‘l jangi federatsiyasi prezidenti Sergey Astaxov hamda mashhur promouter Vladimir Xryunov rasmiy mehmon sifatida tashrif buyurdi.

Jamoaviy tarzda o‘tkazilgan musobaqada o‘zbekistonlik jangchilar Rossiya, Belarus, Qozog‘iston va Tojikiston davlatlaridan kelgan sportchilarga qarshi ringga ko‘tarilishdi. Besh vazn toifasida bo‘lib o‘tgan janglarning barchasida o‘zbekistonlik sportchilarning qo‘li baland keldi.

O‘zbekiston huquqni muhofaza qilish organlari qo‘l jangi federatsiyasi tomonidan tashkil etilgan turnir televideniye orqali jonli tarzda efirga uzatib borildi. Janglar oldidan taniqli san'atkorlar tomonidan badiiy dastur namoyish etildi.