Bloomberg: AQSh Turkiyaga qarshi sanksiyalar tayyorlashga kirishdi

AQSh hukumati sanksiyaga tushadigan turkiyalik yuridik va jismoniy shaxslar ro‘yxatini tuzmoqda. Bu haqda Bloomberg xabar bermoqda. 

Agentlik ma'lumotiga ko‘ra, cheklovlar Rossiya fuqarolari va kompaniyalariga nisbatan joriy etilgan sanksiyalar tamoyilida ishlab chiqilmoqda.

Qayd etilishicha, Vashington tomonidan Anqaraga qarshi ehtimoliy sanksiyalar kiritishi Turkiyada AQSh fuqarosining jinoiy javobgarlikka tortilishi bilan bog‘liq.

Turkiya prezidenti Rajab Toyyip Erdo‘g‘an Turkiya AQShning sanksiyalar qo‘llash tahdidiga qaramasdan Anqara amerikalik pastor Endryu Bronson borasida o‘z pozitsiyasini o‘zgartirmasligini ma'lum qildi.

Turkiyada josuslik va terrorchilar bilan aloqadorlikda ayblanayotgan pastor Endryu Bronson ozod qilinmasa Anqaraga nisbatan sanksiyalar joriy etilishi haqidagi tahdidlarni izohlar ekan, Erdo‘g‘an Turkiya inson huquqlari va mustaqil odil sud tamoyilidan chekinmasligini aytdi.

Prezidentning fikricha, AQSh vakillari tomonidan Anqaraga nisbatan yangrayotgan tahdidlar aslo yo‘l qo‘yib bo‘lmaydigan sionizm va yevangelizmga asoslangan. 
Uning so‘zlariga ko‘ra, AQSh Turkiyaga tahdid qilmasligi lozim edi.

«Anqara o‘z pozitsiyasini o‘zgartirmaydi. Amerika tomoni Turkiyaning mazkur pozitsiyasidan yaxshi xabardor deb o‘ylayman», - dedi Erdo‘g‘an.