Qozog‘iston va Rossiya o‘ta og‘ir raketa yaratishni rejalashtirgan

Qozog‘iston Respublikasi Mudofaa va aerokosmik sanoat vazirligi Aerokosmik qo‘mitasidan ma'lum qilishlaricha, Qozog‘iston kosmik agentligi Rossiya bilan birgalikda o‘ta og‘ir raketani ishlab chiqishda ishtirok etadi. Bu haqda RIA «Novosti» «Kazkosmos»ga asosan xabar bermoqda.

Qayd etilishicha, raketa bo‘yicha qo‘shma ish Boyqo‘ng‘ir kosmodromidagi hamkorlik konsepsiyasida nazarda tutilgan.

«Kelgusidagi hamkorlikning tasdiqlangan konsepsiyasiga muvofiq... Qozog‘iston va Rossiyaning birgalikdagi kosmik loyihalari asosiy istiqbolli yo‘nalishlari sifatida o‘ta og‘ir sinfdagi kosmik raketa kompleksini yaratish belgilangan», - deyiladi Kazkosmos xabarida. 

Shuningdek, Qozog‘istonda Rossiya bilan kichik sun'iy yo‘ldoshlarni uchirish uchun o‘ta yengil raketa va Boyqo‘ng‘irda raketa texnikasi ehtiyot qismlarini ishlab chiqarishni joylashtirish borasida birgalikda ishlash rejalashtirilgan.