Litva Rossiya chegarasiga juda yaqin hududda harbiy poligon qurmoqda

Litva Mudofaa vazirligidan xabar berishlaricha, Kazlu-Ruda shahrida Boltiqbo‘yi mintaqasidagi birinchi harbiy aviapoligon barpo etiladi. Bu haqda mahkama saytida xabar qilindi.

Mavjud ma'lumotlarga ko‘ra, aviapoligon Rossiya chegarasidan 60 km uzoqlikda joylashadi. Uning qurilishi 2018 yilning kuzida tugaydi. Loyihaning amalga oshirish bilan AQSh harbiy-havo kuchlarining muhandislik bo‘linmasi - RED HORSE ham shug‘ullanmoqda. Ushbu loyiha AQShning xavfsizlik kafolatlarini taqdim etish bo‘yicha Yevropa tashabbusi tomonidan moliyalashtiriladi.

Aniqlik kiritilishicha, NATO standartlariga javob beradigan poligonda harbiy-havo kuchlari uchun harbiy kadrlar tayyorlanadi, shuningdek, samolyotlarning yer usti nishonlariga zarba berish bo‘yicha mashg‘ulotlari o‘tkaziladi.

Eslatib o‘tamiz, avvalroq Litva prezidenti Rossiya bostirib kirishi mumkinligini aytgandi.