Litva Belarusdan dron uchib kelganini ma’lum qildi

Litvaning Belarus bilan chegarasi yaqinidagi qishloq atrofiga, dastlabki taxminlarga ko‘ra, uchuvchisiz uchish apparati qulagan, mahalliy aholi portlash ovozini eshitgan. Hodisa joyiga qutqaruvchilar va harbiylar chaqirilgan. Litva bosh vaziri milliy xavfsizlik komissiyasi yig‘ilishini chaqirdi.

Foto: Lisa Louis/DW

Litvaning Varena tumanida, Belarus bilan chegara yaqinida, noma’lum obekt quladi. Bu haqda 23 mart, dushanba kuni mamlakat Mudofaa vazirligi xabar qildi. Litva qurolli kuchlari vakilining so‘zlariga ko‘ra, “eng ehtimoliy taxmin” shuki, bu Belarus tomonidan uchib kelgan dron bo‘lgan.

Obekt Belarus bilan chegaradan taxminan 30 km uzoqlikda joylashgan Lavisos qishlog‘i yaqiniga qulagan. Litva milliy radio va televideniyesi (LRT) gaplashgan mahalliy aholi vakillari tungi soat uchlar atrofida “obektning qattiq g‘uvullashini, so‘ng kuchli portlashni” eshitganini aytdi.

LRT muxbirining xabar berishicha, hodisa joyida dron parchalari yotibdi. Jabrlanganlar haqida xabar berilmagan.

Litva hukumati rahbari Inga Ruginene noma’lum obekt uchib kelgani munosabati bilan milliy xavfsizlik komissiyasi yig‘ilishini chaqirdi. Yig‘ilish 24 mart ertalabga belgilangan.

“Hodisa joyida politsiya, yong‘in xavfsizligi va qutqaruv departamenti ish olib bormoqda, u yerga Harbiy-havo kuchlari vertolyoti va boshqa kuchlar yo‘naltirilmoqda — ‘Qalqon’ rejasi faollashtirildi”, — deb yozdi Ruginene Facebook sahifasida.

Litva bundan avval ham Belarus tomonidan uchib kelgan dronlar va meteosharlar haqida bir necha bor xabar bergan edi. 2025 yil oktyabrida shu sababli Vilnyus aeroporti ishini vaqtincha to‘xtatgan. Dekabr oyida esa hukumat Belarusdan kontrabanda bilan ommaviy havo sharlari uchirilishi davom etayotgani sababli butun mamlakat hududida favqulodda holat rejimi e’lon qilgan edi.

2025 yil avgust oyida NATO a’zosi bo‘lgan Litva Belarus hududi tomonidan dronlar kirib kelishiga javoban chegara bo‘ylab 90 kilometrli parvozlar taqiqlangan hudud tashkil etganini e’lon qilgan. Vilnyus Belarus chegarasidan taxminan 30 km uzoqlikda joylashgan, umumiy chegara uzunligi esa 679 kmni tashkil qiladi. Vilnyus aeroporti Boltiqbo‘yi mamlakatlari ichida yo‘lovchi oqimi bo‘yicha ikkinchi o‘rinda, birinchi o‘rinda esa Riga aeroporti turadi.