Yaponiyalik videos'yomka uchun KXDRdan chiqarib yuborildi

Shimoliy Koreya hukumati mamlakatdan «jinoyat» sodir etgan Yaponiya fuqarosini chiqarib yubordi. Bu haqda Associated Press Shimoliy Koreya ommaviy axborot vositalariga tayanib xabar bermoqda.

Rasmiy bayonotda aytilishicha, Tomoyuki Sugimoto bu ish bo‘yicha so‘roqqa tutilgan. Shunga qaramasdan, yaponiyalik aynan qanday jinoyatni sodir etgani ko‘rsatilmagan.

Shuningdek, xabarda ta'kidlanishicha, KXDR hukumati erkakka nisbatan «bag‘rikenglik» qildi va mamlakatdan «insonparvarlik tamoyillari» asosida chiqarib yubordi.

Kyodo News ma'lumotlariga ko‘ra, erkak Nampxo shahrida sayyohlar guruhi tarkibida bo‘lgani holda videos'yomkani amalga oshirgan. Unda, taxminlarga qaraganda, harbiy obekt ham tasvirga tushib qolgan.

Ta'kidlanishicha, Yaponiya hukumati KXDRning Pekindagi elchixonasi orqali Sugimotoni ozod qilishga kelishib olgan.

Eslatib o‘tamiz, avvalroq Kim Chen In KXDRdagi tibbiyot sohasi ahvolidan darg‘azab bo‘lgandi.