«Hilol» nashriyotida yangi asarlar taqdimoti bo‘lib o‘tdi

Joriy yilning 8 sentabr kuni «Hilol» nashriyot-matbaa majmuasining majlislar zalida diniy-ma'rifiy yo‘nalishdagi ikkita asar taqdimoti bo‘lib o‘tdi. Bu haqda Islom.uz xabar bermoqda.

Tadbirda Muhammad Ayyub Homidov, Obid Mirhamidov, Abdulaziz Usmonov, Akmal Mirhamidovlar qalamiga mansub (g‘oya muallifi shayx Muhammad Sodiq Muhammad Yusuf) «Imomi A'zam» va  Rahmatulloh Sayfuddinov (Sayyid Rahmatulloh Termiziy) qalamiga mansub «Mo‘min kishi – mukarram zot» asarlari taqdimoti o‘tkazildi. 

Shuningdek, Salohiddin domla Abdug‘affor o‘g‘lining Imom A'zam rahmatullohi alayh haqlaridagi ma'ruzalari jamlangan yangi diski (mp3 va DVD formatda) ham mehmonlarga taqdim etildi.

Taqdimot davomida ushbu nashrlar ustida ko‘p kishilik ijodiy jamoa ishlagani, jumladan, musavvirlar, dizaynerlar, texnik mutaxassislar, sahifalovchilar kitobga o‘zgacha mehr bergani holda  nashrga tayyorlashgani, bosmaxona jamoasi ushbu kitoblarning yuqori sifatda bosilishida alohida jonbozlik ko‘rsatishgani alohida e'tirof qilindi.