Italiya o‘z hududiga muhojirlarga kirishni to‘liq taqiqlashi mumkin

Italiya ichki ishlar vaziri, bosh vazir o‘rinbosari Matteo Salvini Germaniya hukumatining muhojirlarni charter reyslar bilan Italiyaga yuborish rejasiga keskin javob berdi.

Salvinining aytishicha, Italiya bunday holatda o‘z aeroportlariga Yevropa Ittifoqi davlatlaridan keluvchi charter reyslarga kirishni taqiqlab qo‘yishi mumkin.

“Kimdir Berlinda yoki Bryusselda Italiyaga ruxsat berilmagan charter reyslarda muhojirlarni jo‘natmoqchi bo‘lsa, shuni bilsinki, bu reyslarni birorta aeroport qabul qilmaydi. Biz avvalroq dengiz portlarini yopgandek, aeroportlarni ham yopib qo‘yamiz”, deb aytgan Salvini.

Avvalroq la Repubblica nashri Berlin Italiya orqali Yevropa Ittifoqiga kelgan muhojirlarni oktabrdan boshlab yana Italiyaga qaytarmoqchiligini ma'lum qilgan.