Nurmagomedovning otasi: Makgregor 3 oy davomida o‘g‘limni masxaralab kelgan

Rossiyalik UFC jangchisi Xabib Nurmagomedovning otasi va murabbiyi Abdulmanap Nurmagomedov irlandiyalik jangchi Konor Makgregor 3 oy davomida o‘g‘lini masxara qilib kelgani haqida gapirdi. Uning aytishicha, Makgregor Xabib Nurmagomedovning gonorar puli miqdoriga aniqlik kiritilmaganini aytib, Nurmagomedovning jig‘iga tegib kelgan.

Keyinroq Xabib mazkur jang uchun 2 million dollar miqdorida gonorar olishi belgilangandi. Konorga esa 3 million dollar va'da qilindi.

«Ular 3 oy davomida jahlimizni chiqarishdi. Gonorar haqida hech narsa ma'lum emasdi. Ikki kun ovqat yemaganman, holdan toyganman», degan u.

7 oktabr kuni tongda o‘tkazilgan UFC 229 turnirining asosiy jangida Xabib Nurmagomedov Konor Makgregorni 4-raundda bo‘g‘ish usuli bilan taslim etdi. Jang yakunida dog‘istonlik oktagondan sakrab chiqdi va irlandiyalik raqibining murabbiyi Dillon Dennisga tashlandi. Xuddi shu vaqtda uning jamoasi a'zolari oktagon ichiga kirib Makgregorning o‘ziga hujum qilishdi. Janjal politsiyachilar aralashuvi bilan to‘xtatildi.

Hozirda Nevada shtati sport komissiyasi ushbu holat bo‘yicha tekshiruv olib bormoqda.

Oxirgi xabarlarga ko‘ra, qoidalarni buzgani uchun Xabib Nurmagomedov diskvalifikatsiya qilinishi va chempionlikdan mahrum qilinishi mumkin. Shuningdek, unga jang uchun to‘lanishi kerak bo‘lgan gonorar tekshiruv yakunlangunicha muzlatib qo‘yilgan.

#Konor Makgregor #Xabib Nurmagomedov

Xabib Nurmagomedov himoya jangida Konor Makgregorni bo‘g‘ish usuli bilan mag‘lub etdi. Ammo jang tugashi bilan oktagon tashqarisida va oktagon ichida janjal yuzaga keldi.