Tramp Saudiya Arabistoniga qarshi sanksiyalar qo‘llashi mumkin

AQShning 22 nafar senatori mamlakat prezidenti Donald Trampga saudiyalik muxolif jurnalist Jamol Qoshiqchining yo‘qolib qolgani tufayli Saudiya Arabistoniga sanksiyalar joriy etilishi lozimligi borasida qaror qabul qilishni so‘rab rasmiy xat yuborishdi. Bu haqda Reuters xabar bermoqda.

Xat mualliflarining ta'kidlashicha, Qo‘shma Shtatlar hukumati Saudiya Arabistonida inson huquqlari buzilishi bo‘yicha tekshiruv boshlashi mumkin. Biroq, bu haqdagi qaror davlat rahbari tomonidan qabul qilinishi lozim. Ushbu tekshiruvlar natijasida Ar-Riyodga nisbatan sanksiyalar joriy qilinishi ehtimolga yaqin.

«Biz shuni kutmoqdamizki, siz o‘z qaroringizni qabul qilishda barcha tegishli ma'lumotlarni, jumladan, Saudiya Arabistoni yuqori martabali mulozimlari bilan bog‘liq barcha holatlarni ham hisobga olasiz», - deyiladi prezidentga yuborilgan xatda.

Eslatib o‘tamiz, avvalroq amerikalik senator Ar-Riyodga qurol yetkazib berishni taqiqlash bilan tahdid qilgandi.