Saudiyalik jurnalist qotilligida gumonlangan shaxs YTH qurboniga aylandi

Turkiyadagi Yeni Şafak nashri xabariga ko‘ra, saudiyalik jurnalist Jamol Qoshiqchining qotilligida gumon qilinganlardan biri Ar-Riyodda yo‘l-transport hodisasi qurboniga aylandi.

OAV ma'lumotiga ko‘ra, Saudiya Arabistoni Harbiy havo kuchlari leytenanti bo‘lgan Meshal Saad al Bo‘stoniy Turkiyaga 2 oktabr kuni yana 14 nafar saudiyalik harbiy bilan tashrif borgandi. Bu guruh Istanbuldagi konsulxonada Qoshiqchini o‘ldirishda gumon qilinayotgandi. 

Hozirda al Bo‘stoniy qayerda va qanday holda YTHga uchragani haqida xabar yo‘q.

Amerikadagi Washington Post gazetasi uchun maqolalar yozgan jurnalist Jamol Qoshiqchi 2 oktabr kuni Turkiyada, Saudiyaning Istanbuldagi bosh konsulxonasiga kirganidan keyin g‘oyib bo‘lgan. Jurnalistning qaylig‘i so‘zlariga ko‘ra, tashqarida uni 5 soat kutgan, keyin ichkaridagilar u allaqachon ketgani, uni kutish shart emasligi haqida aytishgan.