KQTT Suriyada kimyoviy qurol ishlab chiqarilganiga oid dalillarni topmadi

Kimyoviy qurollarni taqiqlash tashkiloti (KQTT) mutaxassislari Suriya hududida kimyoviy qurol ishlab chiqarilayotgani haqidagi xabarlarga dalillar topmadilar. Bu haqda tashkilotning hisobotiga tayanib, RIA «Novosti» ma'lum qildi.

Hisobotda aytilishicha, KQTT mutaxassislari muqaddam kimyoviy jangovar zaharlovchi moddalar ishlab chiqarilgan beshta yer osti inshootini tekshirishgan. Ta'kidlanishicha, tashkilot kotibiyati obektlarga ruxsatsiz kirishga urinish izlari yo‘qligini tasdiqladi.

«Shuningdek, mutaxassislar ushbu obektlardagi ichki bo‘shliqlarni kuzatish uchun o‘rnatilgan masofaviy kuzatuv tizimiga noqonuniy ravishda ulanish bo‘lmaganini ham tasdiqlashdi», - deyiladi hisobotda.

Rossiya tomoni Suriyada kimyoviy qurol ishlatilgani haqida bir necha bor bayonot bilan chiqdi. Rasmiy Moskva fikricha, AQSh koalitsiyasi tomonidan qo‘llab-quvvatlangan «Oq kaskalar» va jangarilar kimyoviy qurolni ishlatgan holda turli fitnalarni amalga oshirmoqda.

Eslatib o‘tamiz, avvalroq Rossiya tashqi ishlar vaziri Sergey Lavrov AQSh IShID yordamida Suriya rejimini o‘zgartirmoqchi ekani haqida ma'lum qilgandi.