Turkiya AQShning muvaffaqiyatsiz urinishlari haqida ma'lum qildi

Turkiya ichki ishlar vaziri Sulaymon So‘yluning ma'lum qilishicha, Qo‘shma Shtatlar Suriyadagi turk harbiy amaliyotiga to‘sqinlik qilishni istaydi, lekin Turkiya bunga yo‘l qo‘ymaydi. Uning so‘zlari Anadolu agentligi tomonidan e'lon qilindi.

So‘yluning ko‘rsatishicha, AQSh 2017 yilda «Furot qalqoni» amaliyotini qo‘llab-quvvatlamadi, 2018 yildagi «Zaytun novdasi» amaliyoti davomida Anqaraga tahdid bilan chiqqan. «Endi esa Vashington Furot daryosidan sharqda shunga o‘xshash qadamlar qo‘yishga harakat qilmoqda. Turkiya bundan oldin bunga imkon bermagan, hozir ham bunga yo‘l qo‘ymaydi», - deya ma'lum qildi Turkiya IIV rahbari.

«Vashingtondagilarning fikricha, ular Turkiyaga amerikaliklar tomonidan tayyorgarlikdan o‘tkazilgan jangarilar qo‘li bilan zarba berishlari mumkin. AQSh Turkiyaga xalqaro bosimni tashkillashtirishga urindi, ammo Anqara barcha to‘siqlarni bartaraf eta oldi», - deya qo‘shimcha qilib o‘tdi u.

Eslatib o‘tamiz, avvalroq Pentagon Turkiyaga Suriya bo‘yicha eslatma bilan chiqqandi.