Yevropa davlatlarida aholining oziq-ovqatga sarf-xarajatlari taqqoslandi 

“RIA Reyting” agentligi Yevropaning 40 ta davlati, Rossiya, Qozog‘iston va Turkiyada aholining sarf-xarajatlari strukturasini o‘rganib, bu davlatlar aholisi oziq-ovqat mahsulotlariga qancha pul sarflashini aniqladi.      

“RIA Novosti” axborot agentligi buyurtmasi bilan o‘tkazilgan tahlilga ko‘ra, Lyuksemburg aholisi oziq-ovqat mahsulotlariga o‘z byudjyetining 8,7 foizinigina ishlatar ekan. Yetakchi uchtalikka Buyuk Britaniya (10 foiz) va Niderlandiya (10,6 foiz) ham kirgan. Rossiyada bu ko‘rsatkich 31,2 foizni tashkil qilar ekan. 

Bu boradagi eng past ko‘rsatkichlar Qozog‘iston, Moldova va Ukrainada qayd qilingan. Qozog‘iston va Moldova aholisi o‘z byudjyetining 40 foizini, Ukraina aholisi esa 50 foizini oziq-ovqatga ishlatishi aniqlangan.

Tadqiqotda milliy statistik xizmatlar, Rosstat hamda Xalqaro valyuta jamg‘armasi ma'lumotlari qo‘llangan.