Isroil Eron bilan ochiqchasiga qarama-qarshilikka kirishdi

Isroil Eron bilan ochiq qarama –qarshilikka kirishdi, dedi Isroil razvedka va transport vaziri Israel Kats. Bu haqda The Jerusalem Post gazetasi xabar bermoqda.

Vazirning so‘zlariga ko‘ra, Isroil HHKning Eronning Suriyadagi «Al-Quds» bo‘linmalariga bergan zarbasi ularning qo‘mondoni Qosim Sulaymoniy va Islom inqilobi qo‘riqchilari korpusiga yo‘llangan aniq xabardir.
«Bizning siyosatimiz o‘zgardi. Bu Eron bilan ochiqcha qarama-qarshilik hisoblanadi. Kerak bo‘lsa, buni yanada kuchaytiramiz», dedi Kats.

20 yanvar kuni Isroil bosh vaziri Binyamin Netanyaxu ham ana shunday bayonot bilan chiqqandi. Uning so‘zlariga ko‘ra, Eronning Suriyada bo‘lishiga qarshi kurashish Tel-Avivning doimiy siyosatidir.