Toshkent aeroportining modernizatsiyasi 50 mln yevroga tushadi

Toshkent shahridagi xalqaro aeroportni rekonstruksiya va modernizatsiya qilish bo‘yicha yirik loyihaning umumiy qiymati 50 million yevroni tashkil etadi. Bu haqda O‘zbekiston Respublikasi prezidenti Shavkat Mirziyoyevning Germaniyaning yetakchi kompaniya va banklari rahbarlari bilan uchrashuvida ma'lum bo‘ldi.

Germaniya O‘zbekistonning strategik muhim infratuzilmasini takomillashtirishda ham faol ishtirok etmoqda, deya xabar beradi prezident matbuot xizmati.

«Shu o‘rinda Toshkent shahridagi xalqaro aeroportni rekonstruksiya va modernizatsiya qilish bo‘yicha umumiy qiymati 50 million yevro miqdoridagi yirik loyihani alohida aytib o‘tish joiz. Germaniya «Navoiy» erkin iqtisodiy zonasi, uning qulay imkoniyatlariga ham katta qiziqish bilan qaramoqda», - deyiladi xabarda.

Eslatib o‘tamiz, avvalroq «Toshkent» aeroporti zalida bepul xizmat ko‘rsatiladigan mansabdor shaxslar toifasi o‘zgargandi.