Avstraliya ham Guaydoni Venesuela muvaqqat prezidenti sifatida tan oldi

Avstraliya Tashqi ishlar vazirligi rahbari Meris Peynning bildirishicha, Avstraliya Venesuela muxolifati yetakchisi Xuan Guaydoni muvaqqat prezident sifatida tan oladi.

Uning aytishicha, Venesuela hududida saylovlar o‘tmagunicha milliy assambleya raisi Guaydo vaqtinchalik prezident maqomida bo‘ladi.

Eslatib o‘tamiz, avvalroq Guaydo Maduroni chetlatish bo‘yicha harbiylar bilan muzokaralar olib borilayotganini ma'lum qilgandi.

Ma'lumot uchun, Venesuelada hokimiyat uchun kurash 23 yanvarda prezident Nikolas Maduroga qarshi miting bilan boshlangandi. Muxolif tomon yetakchisi Guaydoni AQSh, Isroil, Kanada, Albaniya, Gruziya, Braziliya, Argentina, Chili, Kolumbiya, Kosta-Rika, Gvatemala, Gonduras, Panama, Paragvay, Peru kabi davlatlar Venesuela prezidenti deya tan olgan.

Buyuk Britaniya, Germaniya, Fransiya va Ispaniyadan so‘ng Niderlandiya ham Venesuelada sakkiz kun ichida prezident saylovi bo‘lib o‘tishi e'lon qilinmaydigan bo‘lsa, Guaydoni mamlakatning vaqtinchalik prezidenti deb tan olishini ma'lum qildi.