Toshkentdagi «Navro‘z» istirohat bog‘i yil oxirigacha foydalanishga topshiriladi

Toshkent shahridagi «Navro‘z» madaniyat va istirohat bog‘i temiryo‘lchilar tomonidan yil oxiriga qadar qurilib, aholi foydalanishi uchun topshirilishi rejalashtirilgan. Bu haqda «O‘zbekiston temir yo‘llari» xabar qilmoqda.

Mazkur loyihani barpo etish vazifasi «O‘zbekiston temir yo‘llari» aksiyadorlik jamiyatining «O‘ztemiryo‘lqurilishmontaj» unitar korxonasi quruvchilariga topshirilgan. 

Bog‘ uchun 32 gektar yer ajratilgan bo‘lib, bu yerda 3 ming kishilik amfiteatr, diametri 72 metrlik charxpalak, har bir viloyat aholisining o‘ziga xos urf-odatlari, yashash tarzi, milliy hunarmandchilik, pazandachilik an'analarini aks ettiruvchi uylar va ustaxonalar, ayvon-u choyxonalar qad rostlaydi. 

Mazkur bog‘da ommaviy sayllar, konsertlar tashkil etilib, O‘zbekiston aholisi, xususan, yoshlar ma'naviyatini yuksaltirishga xizmat qiladi. Shuningdek, Mustaqillik, Navro‘z kabi bayramlar shu yerda o‘tkazilishi ko‘zda tutilgan, deyiladi xabarda.