Jahon iqtisodiyotiga nisbatan eng katta tahdid Yevropa ekanligi aytildi

Yevropa global iqtisodiy o‘sishga nisbatan eng katta tahdid hisoblanadi. Bloomberg tomonidan o‘tkazilgan so‘rovda qatnashgan analitik va iqtisodchilar ana shunday xulosaga keldi.

Mualliflarning ta'kidlashicha, bunga bir nechta sabab bor. Eng asosiy sabablardan biri AQShning Xitoy bilan savdo urushi ortidan Germaniya va Fransiyada iqtisodiy o‘sishning sekinlashishidir.  

«Agar Fransiya iste'molni, Germaniya esa ishlab chiqarishni to‘xtatsa, Yevrohududni ulkan muammolar kutadi», — dedi Allianz sug‘urta kompaniyasi bosh iqtisodchisi o‘rinbosari Lyudovik Subran.

Shuningdek, Xitoydagi o‘sishning pasayishi ham qiyinchiliklar keltirib chiqaradi. Bundan asosiy bozorini yo‘qotadigan Yevropa kompaniyalari zarar ko‘radi. Italiyaning Fiat va Fransiyaning L'Oreal kompaniyalari allaqachon buni his qila boshladi.

Shunday bo‘lsa-da, analitiklar Yevropada keng miqyosli inqirozning oldini olish mumkinligiga umid qilishmoqda.