Lion Air aviakompaniyasining 35 mln mijozi haqidagi ma'lumotlar o‘g‘irlangan – OAV

Noma'lum kishilar Indoneziyaning Lion Air guruhiga kiruvchi aviakompaniyalarning kamida 35 mln mijozi haqidagi shaxsiy ma'lumotlarni o‘g‘irlab, internetda joylashtirishgan. Bu haqda The Jakarta Post nashri xabar berdi. Xakerlar ushbu axborotni Amazon’ning bulutli xizmatlaridan olishgan.  

Lion Air tarkibiga kiruvchi Malayziyaning Malindo Air aviakompaniyasi vakili Andrea Lion ma'lumotlar tashqariga chiqib ketgani haqidagi ma'lumotning chinligini tasdiqlagan va ushbu hodisa yuzasidan tergov boshlangani, Malayziyaning tegishli idoralari xabardor qilinganini ma'lum qilgan. Bundan tashqari, barcha mijozlarga shaxsiy kabinetga kirish parollarini zudlik bilan o‘zgartirish tavsiya qilingan.

Bu orada Lion Air vakillari izohlardan bosh tortgan. Guruh tarkibiga shuningdek  Indoneziyaning Batik Air, Tailandda joylashgan Thai Lion Air aviakompaniyalari kiradi.

Ta'kidlanishicha, mijozlarning pasport ma'lumotlari, uy manzillari, telefon raqamlari, elektron pochta manzillari erkin foydalanishga tushgan.