O‘zbekiston fuqarolarining ma’lumotlari darknetga chiqib ketgani haqidagi xabar tarqaldi

Reddit platformasida O‘zbekiston davlat organlarining axborot tizimlariga tegishli ma’lumotlar joylashtirilgani aytilayotgan bir nechta resurslarga, jumladan, darknetdagi saytlarga havolalar e’lon qilindi. Ular orasida mamlakatning 15 million fuqarosiga tegishli shaxsiy ma’lumotlar bo‘lishi mumkin.

3 fevral kuni Kiberxavfsizlik markazi vaziyatga izoh berdi.

«Ijtimoiy tarmoqlar orqali ayrim davlat axborot tizimlaridan O‘zbekiston fuqarolarining shaxsiy ma’lumotlari tarqalgani haqida xabarlar kuzatilmoqda. Hozirda mazkur holat bo‘yicha o‘rganishlar olib borilmoqda va holat yuzasidan qo‘shimcha ma’lumotlar taqdim etiladi», – deya qayd etiladi bayonotda.

Fuqarolarga shaxsiy ma’lumotlarini boshqalarga oshkor qilmaslik hamda davlat va boshqa elektron axborot tizimlariga kirishda murakkab login va parollardan foydalanish eslatiladi.

Bundan tashqari, fuqarolardan shubhali havolalar orqali o‘z ma’lumotlarini kiritmaslik so‘raldi.

Ijtimoiy tarmoqlarda aholi va qishloq xo‘jaligini ro‘yxatga olish ma’lumotlari ochiq tarmoqqa sizib chiqqan bo‘lishi mumkinligi haqidagi muhokamalar fonida, Statistika agentligi ham vaziyatga izoh berdi.

«15–31 yanvar kunlari onlayn shaklda o‘tkazilgan Aholi va qishloq xo‘jaligini ro‘yxatga olishda to‘plangan barcha ma’lumotlar, alohida serverda shifrlangan holda xavfsiz saqlanmoqda. Yurtdoshlarimizning ro‘yxatga olish bilan bog‘liq ma’lumotlarining xavfsizligi bo‘yicha xavotirga o‘rin yo‘q», – deyiladi agentlik bayonotida.