AQShda «birinchi raqamli jamiyat dushmani» qabri ochiladi

AQShning Indiana shtati rasmiylari amerikalik mashhur jinoyatchi Jon Dillinjyerning qabrini ochishga ruxsat berdi. “Birinchi raqamli jamiyat dushmani” laqabi bilan ma'lum bo‘lgan gangster 1930-yillarning birinchi qismida harakat qilgan. 

Jinoyatchining qabrini ochish haqida uning qarindoshi Maykl Tompson so‘ragan. Bu haqdagi avvalgi iltimos ham ma'qullangan, biroq unga jinoyatchi dafn qilingan qabriston ma'muriyati e'tiroz bildirgan.

Eksgumatsiya jarayoni 31 dekabrga belgilangan.

O‘z vaqtida AQShning eng qidiriluvchi jinoyatchilar ro‘yxatiga boshchilik qilgan Dillinjyer 1934 yilda FQB xodimlari tomonidan Chikagoda otib o‘ldirilgan. Politsiya ma'lumotlariga ko‘ra, u yetakchilik qilgan jinoiy to‘da banklarning talanishi, politsiya bo‘limlariga hujum qilish va 10 ta qotillikka aloqador hisoblanadi. O‘ldirilganida 31 yoshda bo‘lgan jinoyatchining dafn marosimiga 10 mingdan ko‘proq odam kelgan.

Ikki marta turmadan qochishga muvaffaq bo‘lgan jinoyatchi haqida ko‘plab romanlar yozilgan, badiiy filmlar suratga olingan va spektakllar qo‘yilgan. 

Dillinjyer haqidagi kitoblardan birida aytilishicha, gangster garovga olgan kishilarga mehribonlik ko‘rsatishi, otasiga muhabbati va hazillashishni yaxshi ko‘rishi bilan tanilgan. 

Jinoyatchining yaqinlari uning qabrini FQB Dillinjyerni emas, boshqa bir kishini otgan bo‘lishi mumkinligidan gumon qilayotganlari sababli ochishga qaror qilishgan. Ular DNK-sinov va bir qator tahlillar o‘tkazishmoqchi.

Chikagoda Dillinjyer emas, boshqa bir odam otib o‘ldirilgani va dafn etilgani haqidagi taxminlar anchadan beri mavjud. Ta'kidlanishicha, jinoyatchi hayotligi vaqtida o‘z barmoq izlarini kislota bilan yo‘q qilgan, sochlarini boshqa rangga bo‘yab, qoshlarini terib, plastik operatsiya yordamida tashqi qiyofasini o‘zgartirgan.