Kongolik «Terminator» insoniyatga qarshi jinoyatlari uchun 30 yilga qamaldi

«Terminator» laqabi bilan tanilgan 46 yoshli Bosko Ntaganda ayblovning 18ta punkti bo‘yicha aybdor deb topildi.

Xalqaro jinoyat sudi (XJS) kongolik isyonchilarning sobiq yetakchisi Bosko Ntagandani harbiy va insoniyatga qarshi jinoyatlari uchun 30 yilga ozodlikdan mahrum qilish to‘g‘risida hukm chiqardi. Bu haqda BBC News xabar berdi.

«Terminator» laqabi bilan tanilgan 46 yoshli Ntaganda qotillik, zo‘rlash, odamlarni shahvoniy qullikka majburlash, bolalardan askar sifatida foydalanish kabi ayblovning 18ta punkti bo‘yicha aybdor deb topildi.

Ntaganda 1973 yilda Ruandada tug‘ilgan. U o‘smirlik vaqtida o‘zi mansub bo‘lgan tutsi qabilasi qatliomga uchraganidan so‘ng Ruandadan Kongo Demokratik Respublikasiga qochib ketgan. 17 yoshida "harbiy faoliyat"ini boshlagan Ntaganda isyonchi ham, Ruanda va Kongo askari bo‘lishga ham ulgurgan.

The Global Post nashrining ma'lumotiga ko‘ra, u «Terminator» laqabini urushlarni, xususan, oldingi safda jang qilishni yoqtirgani uchun olgan.