Yamanda paradning raketa bilan o‘qqa tutilishi oqibatida 9 kishi halok bo‘ldi

29 dekabrda Yaman hukumat kuchlarining Ad-Dali shahridagi paradiga hujum qilinishi oqibatida 9 kishi halok bo‘ldi, yana bir necha kishi yaralandi. Bu haqda Al Arabiya telekanali xabar berdi.   

Ad-Dalini nazorat qiluvchi mahalliy kuchlarning ta'kidlashicha, yangi jangchilarning o‘qishi tugashi munosabati bilan o‘tkazilgan parad vaqtida husiychilar tomonidan otilgan raketa portlagan.   

Ta'kidlanishicha, qurbonlar orasida 6 jangchi va 3 bola bor. Yana 20ga yaqin kishi jarohat olgan.

Al Arabiya’ning xabar berishicha, hujumdan keyin voqea joyi yaqinida 3 husiychi jangari qo‘lga olingan. 

Yamandagi qurolli ixtilof 2014 yil martidan beri davom etmoqda. Uning davomida 100 mingdan ko‘proq kishi halok bo‘lgan, millionlab odamlar o‘z uylarini tark etishga majbur bo‘lgan.