11 fevralga o‘tar kechasi AQShning Meksika bilan chegaradosh El-Paso shahridagi aeroport kutilmaganda yopildi. Federal aviatsiya boshqarmasini (FAA) nazorat qiluvchi AQSh Transport vaziri Shon Daffi hududda Meksika jinoiy karteliga tegishli dronning paydo bo‘lishi havo qatnovini taqiqlashga sabab bo‘lganini bildirdi. Dastlab bu taqiq 10 kunga rejalashtirilgan edi, biroq keyinchalik u 7 soatgacha qisqartirildi.
Reuters'ning yozishicha, 700 ming aholisi bor shahar havo hududi deyarli hech qanday ogohlantirishsiz yopib qo‘yilishi — AQSh aviatsiyasi tarixida misli ko‘rilmagan va xavfli holatga sabab bo‘lgan. Bu nafaqat transport logistikasini izdan chiqardi, balki milliy xavfsizlik tizimidagi jiddiy uzilishlarni fosh qildi.
Meksika prezidenti ma’muriyati 11 fevral tongida chegara bo‘ylab dronlar harakati haqida hech qanday ma’lumot yo‘qligini aytdi.
Harbiylar yangi qurolni sinagan bo‘lishi mumkin
Aslida aeroport yopilishining asl sababi kartel hujumi emas, balki Pentagon va Federal aviatsiya boshqarmasi o‘rtasidagi kelishmovchilik bo‘lishi mumkin.
Axios nashrining o‘z manbalariga tayanib yozishicha, Mudofaa vazirligi harbiylari aeroport yaqinidagi Fort-Bliss bazasida dronlarga qarshi yangi lazer qurollarini sinovdan o‘tkazmoqchi bo‘lgan.
Aviatsiya boshqarmasi esa ushbu lazerlar fuqarolik samolyotlarining datchiklariga zarar yetkazishi yoki uchuvchilarni ko‘r qilishi mumkinligidan xavotir olib, havo hududini butunlay yopgan. Natijada ikki idora o‘rtasida o‘zaro muvofiqlashtirish bo‘lmagani uchun «10 kunlik yopilish» haqidagi vahimali qaror e’lon qilingan.
Aviatsiya ekspertlari ham aeroport yaqinida dron ko‘rinishi odatda uzoq muddatli cheklovga emas, balki qisqa tanaffusga sabab bo‘lishini ta’kidlamoqda.
Nashrning qayd etishicha, AQSh Transport vaziri Shon Daffi va Oq uy voqeani darhol «Meksika kartellari tahdidi» deb talqin qilgan. Biroq, bu – siyosiy qalqon edi: ma’muriyat o‘z ichidagi texnik va byurokratik xatoni yashirish uchun tashqi dushmanni ayblash yo‘lini tanlagan, deb yozmoqda Axios.
