AQSh Eron yaqinida qo‘shin to‘plamoqda. Urush xavfi oshdi

Oxirgi vaqtlarda tarqalayotgan xabarlardan Amerika baribir Eronga hujum qiladigandek taassurot paydo bo‘lmoqda. Amerika nashrlariga ko‘ra, Eron yadroviy kelishuvni paysalga solayotgani Trampning toqatini toq qilibdi. Amerika Yaqin Sharqda oxirgi marta 2003 yilda hozirgi kabi qo‘shin to‘plagan va o‘shanda Iroqqa bostirib kirgandi...«Bossning toqati toq bo‘lyapti»

Amerikaning Axios nashri o‘z manbalariga tayanib yozishicha, Tramp yaqin haftalar ichida Eronga zarba berish bo‘yicha qaror qabul qilishi mumkin. «Bossning toqati toq bo‘lyapti. Atrofidagilar uni Eron bilan urushdan qochishga chaqiryapti, lekin yaqin haftalarda zarba berilishi ehtimoli 90 foizga teng», degan prezident maslahatchilaridan biri nashr bilan suhbatda. Mashhur respublikachi senator Lindsi Grehem ham tez orada zarba berilishi mumkinligi haqida gapirdi.

Tayyorgarlik katta

Amerika Yaqin Sharqda juda jiddiy harbiy tayyorgarlik o‘tkazmoqda. Bu o‘tgan yil yozda Eron va Isroil o‘rtasida kechgan 12 kunlik urush vaqtidagi tayyorgarlikka o‘xshamaydi, bu gal barchasi jiddiy. Amerika harbiy havo kuchlarini yoppasiga ehtimoliy operatsiya uchun jalb qilgan.

Oxirgi bir kun ichida mintaqada F-35, F-22, F-15 qiruvchi samolyotlari va radiolokatsion aniqlash aviatsiyasiga yonilg‘i quyadigan qo‘shimcha 19 ta samolyot harakati payqalgan. 18 fevral kuni dunyodagi onlayn radarlarda eng ko‘p kuzatilgan reyslar aynan mana shu samolyotlar bo‘lgan. Qiruvchi samolyotlarga havoda yonilg‘i quyadigan bunaqa samolyotlarning kamida 16 tasi allaqachon Qatardagi Al Udeyd bazasida turibdi. Shuningdek, bazada ikkita aviatashuvchi kema ham langar tashlagan.

Bunchalik ko‘p yonilg‘i quyuvchi samolyotlar, tankerlar va aviatashuvchilar to‘planayotganiga qaraganda, Amerika Eronga shunchaki zarba berib ketishni emas, to‘laqonli harbiy operatsiya o‘tkazishni ko‘zlamoqda. Zamonaviy til bilan aytganda Amerika Eronda «SVO» o‘tkazmoqchiga o‘xshaydi.

Amerikaliklar Yaqin Sharqda oxirgi marta 2003 yil bunaqa jiddiy qamrovda qo‘shin to‘plagan va Iroqqa bostirib kirgandi. Axios'ning yozishicha, AQSh mintaqaga qo‘shimcha 50 ta qiruvchi samolyot yuborgan. Nashrning Tramp bilan yaxshi aloqada ekani aytiladigan jurnalisti Barak Ravidning so‘zlariga ko‘ra, Tramp ma’muriyati Yaqin Sharqdagi katta urushga ko‘pchilik o‘ylaganidan ancha yaqinroq. Ekspertlar AQSh mintaqaga mavjud barcha turdagi harbiy resurslarini yuborayotganiga e’tibor qaratgan.

Isroil ham tayyorlanmoqda

AQSh Eronga hujum qilishi mumkinligi fonida Isroilda ham harbiylarga urushga tayyorlanish buyurilgan. Butun mamlakatdagi harbiy tuzilmalar yuqori darajali tayyorgarlik holatiga keltirilgan. Amerika hujumni boshlasa, katta ehtimol Isroil ham Tehronga zarbalarda ishtirok etadi. Amerika hujumiga javob o‘laroq Eron Vashingtonning mintaqadagi bazalaridan tashqari Isroilga ham zarba berishi istisno qilinmayapti.

Xullas, Tramp navbatdagi «SVO»ga tayyorlanayotgani ko‘rinib turibdi. Yadroviy muzokarada mo‘jiza sodir bo‘lib, tomonlar kelishuvga erishmasa, Amerika va Eron o‘rtasidagi urush muqarrarga o‘xshaydi. Lekin Eronga qarshi operatsiya Venesuelada bo‘lgani kabi oson kechmasligi aniq. Amerika har qancha kuchli bo‘lmasin, Eron ham urushishni biladi. Amerika Tehrongacha kirib borib tog‘ ostidagi yadroviy obektga zarba berib, keyin hech nima bo‘lmaganday chiqib keta olishini ko‘rsatib bo‘ldi, lekin bu gal Tramp shunchaki B-2 bilan zarba berib ketish bilan cheklanmoqchi emas.

Bir necha yil avval Amerika Yaqin Sharqda qo‘shin to‘plab, Eronga zarba bermoqchi ekanini aytsa, buni shunchaki tahdid deb tushunishardi. Lekin Trampning ikkinchi muddatida dunyoda tartibot butkul o‘zgarib ketdi. Amerika Eronga to‘g‘ridan-to‘g‘ri zarba yo‘lladi, Venesueladan prezident olib qochdi. Bu Amerikadan har qanday ishni kutsa bo‘ladi. Axir dunyo tartiboti degan tushuncha chiqindiga uloqtirilgan, hozir dunyoda Tramp tartiboti hukmron...