Tramp Erdo‘g‘anni Liviyadagi vaziyatga aralashmaslikka chaqirdi

AQSh prezidenti Donald Tramp turkiyalik hamkasbi Rajab Toyyib Erdo‘g‘an bilan telefon suhbatida Liviyadagi vaziyatni keskinlashtirmaslik uchun unga aralashmaslikka chaqirdi. Bu haqda Oq uy xabar qildi.

Tramp Erdo‘g‘anga Turkiya parlamenti Liviyaga harbiylarni jo‘natish haqidagi qonun loyihasini ma'qullagandan keyin qo‘ng‘iroq qilgan.

“Prezident Tramp suhbatda xorijiy aralashuv Liviyadagi vaziyatni murakkablashtirishini ta'kidlab o‘tdi”, deyilgan Oq uy bayonotida. 

2 yanvarda Turkiya parlamenti Liviyaga qo‘shinlarni yuborishga ruxsat beruvchi qonun loyihasini qabul qilgandi.

Avvalroq Erdo‘g‘an Anqara Liviyada Rossiyaning “Vagner” xususiy harbiy kompaniyasi yollanma jangchilari borligiga “ko‘z yumib o‘tirmasligini” aytgan. Uning ta'kidlashicha, rossiyalik yollanma jangchilar Liviyaning xalqaro tan olingan hukumatiga qarshi chiqayotgan Liviya milliy armiyasi qo‘mondoni -  marshal Halifa Haftarga ishlaydilar.