Xorvatiyadagi prezident saylovlarida sobiq bosh vazir g‘olib bo‘ldi

Xorvatiyada prezident saylovlarining 5 yanvarda o‘tgan 2-bosqichi natijalariga ko‘ra mamlakatda keyingi 5 yil prezident lavozimini muxolif Sotsial-demokratik partiya nomzodi, sobiq bosh vazir Zoran Milanovich egallaydigan bo‘ldi.

Xorvatiya davlat saylov komissiyasi ma'lumotlariga ko‘ra, Milanovichga 52,7 foiz, uning raqibi - amaldagi prezident Kolinda Grabar-Kitarovichga esa 47,3 foiz ovoz berilgan. 1-bosqichda ham amaldagi prezident g‘olibdan kamroq ovoz to‘plagandi. 

“Men mamnunman, g‘alaba og‘ir, biroq chin bo‘ldi”, deb aytgan Milanovich.

Uning ta'kidlashicha, u “zamonaviy, taraqqiy etuvchi va ochiq Xorvatiya prezidenti” va “mamlakati, xalqi va fuqarolarining oliy himoyachisi” bo‘lishni istaydi. 

53 yoshli Zoran Milanovich Xorvatiya bosh vaziri lavozimini 2011 yil dekabrdan 2016 yil yanvargacha egallagan.