Хорватиядаги президент сайловларида собиқ бош вазир ғолиб бўлди

Фото: Marko Đurica/Reuters

Хорватияда президент сайловларининг 5 январда ўтган 2-босқичи натижаларига кўра мамлакатда кейинги 5 йил президент лавозимини мухолиф Социал-демократик партия номзоди, собиқ бош вазир Зоран Миланович эгаллайдиган бўлди.

Хорватия давлат сайлов комиссияси маълумотларига кўра, Милановичга 52,7 фоиз, унинг рақиби - амалдаги президент Колинда Грабар-Китаровичга эса 47,3 фоиз овоз берилган. 1-босқичда ҳам амалдаги президент ғолибдан камроқ овоз тўплаганди.

“Мен мамнунман, ғалаба оғир, бироқ чин бўлди”, деб айтган Миланович.

Унинг таъкидлашича, у “замонавий, тараққий этувчи ва очиқ Хорватия президенти” ва “мамлакати, халқи ва фуқароларининг олий ҳимоячиси” бўлишни истайди.

53 ёшли Зоран Миланович Хорватия бош вазири лавозимини 2011 йил декабрдан 2016 йил январгача эгаллаган.