Shayxontohur tumanida sodir bo‘lgan YTH haqida ma'lumot berildi

Toshkent shahar IIBB Shayxontohur tumanida sodir bo‘lgan yo‘l-transport hodisasi haqidagi xabarlar bo‘yicha rasmiy ma'lumot berdi.

Qayd etilishicha, 28 iyun kuni taxminan soat 20:50da Zulfiyaxonim ko‘chasida («Rayhon» kafesi qarshisida) Spark rusumli avtomobil haydovchisi, 53 yoshli T.I. yo‘lni belgilanmagan joydan kesib o‘tmoqchi bo‘lgan piyoda, 10 yoshli F.N.ni urib yuborgan. Piyodalar yo‘lakchasi hodisa joyidan yuz metr uzoqlikda bo‘lgani aytiladi.

YTH natijasida piyoda tan shikastlari bilan tibbiy muassasaga yetkazildi, ammo shifokorlarning urinishlariga qaramasdan, hayotdan ko‘z yumdi. 

Ushbu fakt yuzasidan O‘zbekiston Respublikasi Jinoyat kodeksining 266-moddasi 2-qismi («Transport vositalari harakati yoki ulardan foydalanish xavfsizligi qoidalarini buzish») bo‘yicha jinoiy ish qo‘zg‘atildi.

«Hurmatli hamshaharlar va Toshkent mehmonlari. Bu kabi holatlarning oldini olishda haydovchilarning ham, piyodalarning ham o‘rinlari muhim. Yo‘l harakati qoidalariga qat'iy rioya qiling. Ota-onalardan farzandlariga yo‘l harakati qoidalarini tez-tez tushuntirib turishlarini so‘raymiz», - deyiladi IIBB ma'lumotida.